أكبر الساقطين فانتخابات 2016

أكبر الساقطين فانتخابات 2016

زهور باقي

“البيجيدي” و”البام” بوحدهم  جمعو 227 كرسي من أصل 395 مقعد برلماني، ودارو “ميسا” وجمعو وطواو مع باقي الأحزاب اللي “ماشطحتو ماغنيتو، غير جيتو وتبندتو”.  وكيما كاين الغالبين كاين “الخاسرين” من الأحزاب اللي شاطت، واللي مانفعتهم لا كروسة ديال هندية ولا الحلاق ديال سباتة.

“لشكر” إذا تلفتي، شد لأرض

الاتحاد الاشتراكي اللي كيتعتبر من أقدم الأحزاب المغربية بتاريخها وتجربتها وخبرتها وشهدائها وصل حتا لإدريس لشكر و”تكردع”.  لشكر اللي سبق ليه قال قبل مايبانو النتائج، أنه غادي يتصدر النتائج “بوجهو حمر” جاب 20 مقعد.. يالاه يالاه يقدر يدير بها فريق برلماني. لشكر يمكن كان كيقصد غادي يجي هو الأول من الجهة التحتانية ديال القائمة. الكاتب الأول ديال “الوردة” حاضر ديما بخرجات غريبة و”محنكة” بحالو، خرجات غير كيشير بها هي وفين جات، وصلت به لدرجة يشبه الوضع فالمغرب بأنه غادي يولي بحال سوريا فحالة ما نجح “البيجيدي” ذو المرجعية الإسلامية، ولكن أ لشكر راه “المسار الديمقراطي” غادي ومكاين لا سوريا لا روسيا والملك  استقبل بنكيران وكلفو بتشكيل الحكومة. لشكر واخا هكذاك عارض وقرر يرسل مذكرة عاجلة للملك يتشكى فيها من “الثنائية القطبية” ديال البام والبيجيدي اللي كتعرقل المسلسل الانتخابي، واعتبرها “واهية ومزيفة” وكيتشكى من استعمال المال والدين باش يتقواو… وت اسي لشكر متقويتي مخليتي احزاب اخرى تقوا.. حزب الاتحاد الاشتراكي هو أكبر الخاسرين  فعلا  من المرتبة الأولى ف1997 خلاتو يقود الحكومة بعبد الرحمان اليوسفي، وف2002  واخا ماقادهاش، حتى بدات الأزمة كتبان ف2007 ملي جاب المركز الخامس ومن تما ل39 مقعد ف2011 ل20 مقعد ف2016.  بلاصة ما لشكر يتحمل جميع مسؤولياتو كقائد حزب عريق بحال الاتحاد الاشتراكي فهاد النتائج الكارثية بمرتبة سادسة، كيقلب على أي شماعة يعلق عليها أخطاؤو. وتحول من حزب اللي اكتسب شعبيتو  بسمعته كمعارض وأسسوه  قامات بحال عبد الرحيم بوعبيد والمهدي بنبركة، ولى كيطبل ويغيط فسبيل الحصول على أي منصب لدرجة الاستنجاد بالقصر. لشكر تلف ومالقاش شي حد يقوليه شد لارض. مرة كيقوليك لن نتحالف مع البيجيدي، من بعد ما طبل للبام قبل النتائج بأنه هو الحليف ديالو الإيدولوجي. ودابا لقا واحد التخريجة ولصق فشباط وقاليك اللي دارها الاستقلال أنا معاه سواء فالمعارضة أو الحكومة. شفتو “الحنكة” كي دايرة؟

من “بصيرة” الفاسي ل”بيصارة” شباط

شباط الأمين العام ديال حزب الاستقلال، كان أكثر واحد حاضر فالحملة الانتخابية، ماخلا رايب ماخلا سفنج، ماخلا بابوبش، ماخلا فرناتشي وحتا تاحلاقت دارها.. وقعلو إسهال ماشي فكرشو لا فعدد الصور اللي دار فصفحة الحزب، ولكن واخا هكذاك ماقدرش يجيب حتا مقعد ديالو ففاس فما بالك يسير حزب كامل بحال حزب الاستقلال اللي الشعبية ديالو كواحد من أقدم الأحزاب المغربية غادية وكتنقص. سجل حزب الاستقلال خسارة  ملحوظة بعدما تراجع عدد مقاعده من 60 ل46 مقعد. الاستقلال واخا جا هو الثالث، بزاف من القيادات ديالو المعروفة عند الناس واللي فيهم وزراء سابقين “تكردعت” هي الأخرى بداية بياسمينة بادو لغلاب، لعبد الله البقالي، لأبو حفص.

أبو حفص أو عبد الوهاب رفيقي  المعتقل ف 2003 بعد تفجيرات الدار البيضاء، كان كيمثل فهاد الحملة الانتخابية إدماج السلفيين بعد العفو الملكي عليهم واللي دارو “مراجعة فكرية” وتبعاتو حملة إعلامية سلطت الضوء عليه كمرشح باسم حزب يميني محافظ  بفاس-الشمال قادما من حزب النهضة والفضيلة، واخا مانجحش صرح بأنها نتائج مترقبة لأنها أول مشاركة ديالو، ومكانش معول على الفوز من أول تجربة. الصراحة يقدر يكون مانجحش غير حيث كان “كيعمر مع شباط” فدوك الحملات ديالو وكان غي بقيتي بعيد!   هادشي كيبين أنه فاش كان سلفي واقيلا كانت عندو شعبية كثر من استقلالي، عندك تندم أ أبو حفص؟

الاستقلال خسر أيضا حتا بالوجه البارز ديال عبد الكريم الغلاب أصغر رئيس مجلس النواب والوزير سابقا اللي حتاهو قاليك فتصريح سابق أن الاستقلال يقدر يتصدر الانتخابات، ماقدرش هاد المرة يحصل حتا على المقعد ديالو المعتاد بدائرة ابن مسيك بكازا، واخا كلس على كرسي الحلاق فسباتة وصورها كاع فالفاسبوك، ولكن معامن جيتي؟ داها ليه محمد جودار من الاتحاد الدستوري وعبد اللطيف جوبيج من العدالة والتنمية وتوفيق كمال من التجمع الوطني للأحرار خصوصا، وهادشي خلاه يتصاب بانهيار حاد.  مانساوش الوزيرة الضاحكة  ف 2002 وف 2011 ياسمينة بادو اللي كتحماق على شي حاجة سميتها الكراسي والمناصب وكولشي كيتذكر تصويرتها فعتبة الباب ديال الولاية كتتسنى تحط الترشيح ديالها. هاد المرة  داوليها المقعد فدائرة انفا كل من فيديرالية اليسار والعدالة والتنمية والأصالة والمعاصرة وعاقبوها الساكنة حيث مكاتبان غا من الحملة للحملة ولا فشي فضيحة بحال الشقق واللقاحات.. ملي كيفقد غلاب المقعد  فابن مسيك وولد الحزب عبد الله البقالي، مدير جريدة العلم ورئيس النقابة الوطنية للصحافة بالمغرب واللي كان معول عليه الحزب، لمقعده فالعرائش فهذا كيبين أن حزب الاستقلال  غادي للهاوية واللي كيرجعوها متعاطفين مع الحزب لسوء التسيير ديال شباط.  “بعبع” الأحزاب، الميزان، خسر الشعبية اللي بناها علال الفاسي بالبيصارة اللي كياكلها شباط.

الجديد لو جدة، والبالي فرط  فيه

حزب التجمع الوطني بقيادة لشكر تصنف ثاني أكبر الخاسرين حسب المتتبعين من بعد ما حصل على 37 مقعد فالوقت اللي كانت عندو 52 مقعد ف2011 أي بفارق 15 مقعد كلها “كلاهالو” البام، الصراحة “البام” “كلاها” ليهوم كاملين من بعد ماتزادو ليه 55 مقعد ونقز من الرابع ف2011 للمرتبة الثانية ف2016، وهو الحزب اللي يالاه تأسس زعما في 2009.  وهادشي يمكن اللي خلى مزوار يدفع الاستقالة ديالو، ملي كيلقى أنه بنكيران اللي كان حليف معاه فالحكومة تزادو ليه 18 مقعد ومادارش الشعب ضدو تصويت عقابي وهو جابها فراسو.

أما واحد نبيل بنعبدالله واخا فالوقت بدل الضائع من الحكومة دار خرجة صنفوها شي وحدين “بطولية” ملي خرج كيشير على التحكم بالاسم والنسب واللقب، والديوان الملكي دار بلاغ ضدو. فالغالب الله صدق لا ديدي لا حب ملوك، لا هو شيوعي لا هو إسلامي، لا هو فالحكومة ولا هو برا الحكومة، لا هو فالكتلة ولا هو خارجها، من بعد ما حصل يالاه يالاه على 12 مقعد، يعني مشاو ليه 6 مقاعد.

حسب المحلل السياسي عمر الشرقاوي كيعتبر أن الأحزاب الكلاسيكية كتواجه أزمة وكيصرح لبابوبي “رجة سياسية أدخلت أحزاب الحركة الوطنية لقاعة الإنعاش فهاد الانتخابات. فقد الاتحاد 24 مقعد، والاستقلال 15 مقعد، والتقدم 4 مقاعد. مجموع ما حصل عليه الاتحاد والاستقلال والتقدم وهي عمرها كيتعدى 180 سنة  كيفوت غير بشوية نصف ما حصل عليه البيجيدي اللي  تأسس ف96. لائحة ريع اللائحة الوطنية للبيجيدي تجاوزت بسبع مقاعد كل ما حصل عليه الاتحاد فالدوائر المحلية والوطنية..ما حصل عليه البيجيدي فكازا فاق ما حصل عليه “البي بي اس” فالمغرب كله سواء على المستوى الوطني والمحلي واش رجة هاديي ولا مش رجة”. اييه رجه فعلا ا سي عمر…

نبيلة رئيسة حكومة الفاسبوك

الأمينة العامة لحزب الاشتراكي الموحد، المرشحة عن فيدرالية اليسار الديمقراطي المشكلة من 3 أحزاب، فشلت باش توصل للبرلمان بجميع الطرق والوسائل، مانجحت لا فاللائحة الوطنية ديال النساء مانجحت فالدائرة المحلية فاش ترشحت فالانتخابات الجماعية والجهوية ديال 2015 فدائرة انفا.  واخا الفيديرالية ربحت جوج مقاعد، وواخا نبيلة خدات رئاسة الحكومة فالفاسبوك بفعل حضورها القوي فمواقع التواصل الاجتماعي ولكن مانفعهاش الفاسبوك، وظهر مرة أخرى أن الميدان هو كولشي.. الميدان اللي غابت عليه طيلة خمس سنوات رغم أنها كانت حاضرة بكارافان قوي غطى أغلب مناطق الملكة فين دارت مهرجانتها الخطابية ديال الحملة. نبيلة منيب ضربت كولشي واعتبرت أن الشعب اللي كيصوت على البيجييدي هو شعب “حفظ وعرض”، واعتبرت أن التحالف مع البام والبيجيدي خط أحمر وهي باقي ماقدرت حتا تجيب مقعد ديالها. وهادشي كيطرح أكثر من علامة استفهام حول الأمل اللي زرعاتو فالشعب، شعب الفاسبوك طبعا، ولكن ماعندهاش الآليات الميدانية باش تتنظم وتقوي راسها. نبيلة منيب حسب المدون الساخر خالد الشرادي “فازت بلقب ملكة جمال حب الملوك”. وبلاصة ما نبيلة منيب ترتب بيتها الداخلي وتنزل للتيران نزلت بالاتهامات الكلاسيكية مرة أخرى على المال والدين والمخزن يا جبان واليسار لا يهان…

مقالات ذات صله