الحد الأدنى للأجور.. السقرام والسخي..

الحد الأدنى للأجور.. السقرام والسخي..

عادل نعيم

ف2011 البيجيدي مكانش كيعرف يحسب واقيلا ودفع كبير فالأرقام، لكن من بعد ما قاد الحكومة بان ليه باللي السواد الأعظم من المغاربة يمكنهم يعشيو بأقل من الحد الأدنى للأجر، واخا يخفض الدعم.

هاد المرة ما عطاش الحزب شي رقم حول الحد الأدنى للأجور، ربما لأنه عارف راسو ما غاديش يزيد فالأجور، وبحال أحزاب أخرى، ما باغيش يقلق أرباب العمل.. بحال ديال النسيج مثلا، خاصة أن الباطرونا كانت غضبات على رئيس الحكومة، عبد الإله بنكيران، ملي قرر ف2014 الزيادة فالحد الأدنى للأجور ب 10 فالمائة.

الاتحاد العام لمقاولات المغرب قال بالي هاد القرار كيأثر على التنافسية ديال الشركات، واخا رئيس الحكومة قال باللي الحد الأدنى ما يكفيش الشاب باش يتزوج ويكري.. واعتبرو “أرجون دو بوش”، ما زعمش فهاد المرة، تعلم الحساب.

فالوقت اللي كيبان العدالة والتنمية “شحيح”.. بان الاتحاد الاشتراكي سخي مع الأجراء، حيث وعد الكاتب الأول إدريس لشكر، باش يزيد فالحد الأدنى للأجور ب 30 فالمائة.

باين لشكر باغي يدير هاد الزيادة ملي يقود “التناوب الثالث” اللي تكلم عليه فالكتاب ديالو. حتى الحركة الشعبية ديال امحند العنصر قالت باللي غادية ترفع الحد الأدنى ل3000 درهم.

وبطبيعة الحال، قالت فيدرالية اليسار الديمقراطي، باللي غادية ترفع الحد الأدنى للأجر إلى 3000 درهم فالشهر، بشكل تدريجي.

الأحزاب الأخرى، على حد علمنا، حتى واحد فيها ما قدم شي وعد حول الحد الأدنى للأجور، يعني رقم.. كولشي وعد بتصحيح الوضع الاجتماعي.

دابا الكلمة الأخيرة فيه غادية تكون للباطرونا، اللي تقوات بتحالف حكومة بنكيران معها وتلبية مطالبها،  وهي محال تقبل الزيادة فالحد الأدنى للأجور، لأن عبر الأجور المنخفضة باش كتزيد الأرباح ديالها.

وراه بدات الهضرة مع بنكيران مؤخرا، باش يديرو الشباب أعمال صغيرة فساعات قليلة فانتظار يخدمو، يعني سير تضيم، كيبان باللي بزاف ديال الأحزاب ملي كتهضر على الزيادة فالحد الأدنى للأجور كتبغي غير تخلي مسؤوليتها.

وماننساوش أنه فاتفاق 26 أبريل 2011، اتفقت النقابات مع الحكومة والباطرونا، على توحيد الحد الأدنى فالزراعة والصناعة والخدمات وما تطبقش الاتفاق، حيث كان غير قرارا حتى تدوز الرياح ديال 20 فبراير وكل واحد يدير اللي عجبو.

مقالات ذات صله