الراضي: كنبقى ساكت وكيجيوني الأصوات حتا لعندي

الراضي: كنبقى ساكت وكيجيوني الأصوات حتا لعندي

بابوبي: سي عبد الواحد مبروك 

عبد الواحد الراضي: كيفاش مبروك أ سي بابوبي؟؟ واش شي واحد ساكن فدار 53 عام ومشى سافر 15 يوم ورجع ليها غادي نقولو ليه مبروك؟

بابوبي: ماشي مبروك على المقعد هاداك را عارفينو ديالك.. مبروك دخلتي لكتاب غينيس كأقدم معمر سياسي.

عبد الواحد الراضي: نعم الله يبارك فيك.. هذا تحدي كنت واحد على راسي ما يمكنش نخلي الوطن ديالي بلا رقم قياسي فالسياسة، كنت مبرزط مع القذافي لي هناوني منو الثوار وفيديل كاسترو اللي ما قدرش يساير الإيقاع ديال السباق وسمح فكولشي.

بابوبي: سي الراضي ما عيتيش هاد السنين كلها ونتا فالبرلمان؟

عبد الواحد الراضي: ها ها ها ها علاش غادي نعيا ؟؟ مالني شنو كندير باش نعيى؟؟ كنمشي للبرلمان نحفر البير را كنمشيو كلنا غير نانكلو ونشربو ونجمعو ونديرو القيلولة تما، واش كاين شي واحد كيعيى من النعاس؟

بابوبي: واش هاد الناس ديال القصيبة مازال ما لقاوش شي واحد ينوب عليهم من غيرك؟

عبد الواحد الراضي: الناس ديال لقصيبة 53 عام وأنا معاهم مخدمهم فلفيرمات ديالي، كنحل ليهم مشاكلهم، ما بقاوش كيشوفو فيا نائب برلماني وليت بحال الوالد ديالهم اللي ولفوه ديما فالبرلمان وكيفتخرو بيا بزاف قدام لوخرين، حيت النائب ديالهم هو رئيس إتحاد البرلمان الدولي. واش كاين شي واحد غادي يخلي باه ويمشي يصوت على واحد خور؟

بابوبي: نتا المرجعية ديالك إشتراكية وعندك بزاف ديال الأراضي كيفاش زعما؟

عبد الواحد الراضي: نعم أنا إشتراكي وغادي نبقى ديما إشتراكي مع تأميم الأراضي، وبالنسبة لجهة الغرب أنا هو الأمة اللي جامعة الأراضي وداير بها للساكنة الكولخوزات والسوفخوزات كنزرعو وكنحصدو وكنتقاسمو الغلة بيناتنا.

بابوبي: الإتحاد الإشتراكي كيخسر ونتا ديما رابح؟

عبد الواحد الراضي: حيت أنا قاري علم النفس وعلم الإجتماع عارف النفسية ديال الناخبين كنبقى ساكت وكيجيوني الأصوات تال عندي، ماشي بحال لشكر ما قاري والو كيبقى غير داوي غادي نتصدر الإنتخابات عندي الملكية الفكرية ديال البرنامج الانتخابي و فلخر كيجمع الزيروات.

مقالات ذات صله