الرجاء… الرجا فالله

الرجاء… الرجا فالله

بابوبي

آش وقع فالجمع العام ديال الفريق العالمي اللي تقام ليلة الاثنين فواحد الأوطيل فطريق ليساسفة فكازا، محمد بودريقة الرئيس المستقيل واللي منوض الحرب مع كلشي، كيغادر سفينة الفريق الكازاوي العريق، اللي تأسس بتاريخ 19 مارس 1949 ، بعدما دوز أربع سنين فالرئاسة سالاها بالاستقالة من جامعة الكرة ومن رئاسة الفريق. الفريق اللي كيتسالو كثر من 3 ملايير ديال الضرائب، وممخلصش مستحقات الضمان الاجتماعي اللي كتزيد على 80 مليون. المهم بودريقة طار، وعادل با معروف عضو المكتب السابق سحب ترشيحو، باش يبقى سعيد حسبان هو المرشح الوحيد لقيادة الفريق بعد واحد مولاي الجمع عام.

واحد خيينا تساءل بمكر واش سعيد الناصري رئيس فريق الوداد البيضاوي الخصم التاريخي ديال الرجاء، هو اللي رشح حسبان بعدما تأكد من أنه غيقود الفريق الأخضر نحو الهاوية وأن أكبر مستفيد من العملية غادي يكون فريق الوداد.

البوصيري مورا بودريقة

الصحافي والخبير الرياضي يونس الخراشي كيقول فتصريح لبابوبي أن بودريقة شاب من عشاق الرجاء، وبحكم أنه مقاول فالبناء وباه مقاول كبير فالبناء، عندهم الفلوس وشي وحدين استغلو الحب ديالو للفريق وفلوسو، والرغبة فالرئاسة والشهرة، دفعوه باش يحلم برئاسة الفريق، وأهم هاد الناس كاين عبد الرحيم الوزاني طريجم، وأنور الزين، اللي وجدو ليه واحد الكتاب أخضر (ماشي بحال ديال القذافي) ملي ترشح ضد حنات وفشل، هاد الفشل ماوقفش الطموح ديال بودريقة، خصوصا أن الرجل أو “الرقم الصعب” اللي كان من موراه وكيساندو هو رشيد البوصيري، واللي كان تطرد بشكل من الأشكال من الرجاء، وقرر ينتاقم لراسو، وبزاف ديال المتتبعين كيقولو بلي البوصيري هو اللي دار التيفو الشهير “باسطا”.

البوصيري كان اقترح على بودريقة فكرة واعرة، وهي يجيب فاخر، وقبل حتى الجمع العام، كان فاخر دار خدمتو، خلى الفريق فأكادير، وبدا يخدم مع بودريقة، باش يوجد الفريق للموسم المقبل، على أساس أن بودريقة غيكون هو الرئيس، والخطة مدروسة ديال البوصيري، اللي نشط مزيان مع المنخرطين وهيأ الأجواء. ولأن الثنائي البوصيري وفاخر خطير جدا، ناضو شراو كل اللاعبين المميزين بأموال بودريقة، باش يفرغوا لفراقي لوخرين ومينافس حد الرجاء.

 بودريقة رئيس زاد فيه شوية

وهكذا، كيكمل لينا الصحفي يونس الخراشي “حصل بودريقة على أصوات المنخرطين، وحصل حتى على دعم الجماهير أيضا، الإلترات، بفضل الأرمادا اللي وجد، وبفضل الوعد بالفوز بكل الألقاب. وفعلا فازت الرجاء بلقبي البطولة والكأس، وبدا بودريقة كيغير معالم كولشي داخل الرجاء وأصبح رئيسا للمكتب المديري، ونجح أنه يلغي كل الرجالات التاريخيين للفريق في مقدمتهم أوزال وما أدراك ما أوزال…” من بعد هادشي جات اللحظة التاريخية وهي اللي حلم بيها بودريقة وهي أعز ماكايتمناه مقاول بناء، وهو أنه يسلم على الملك، ويتصور معاه، ولى بودريقة قوي وقدر يتحكم فكولشي، حتى فرقبة فوزي لقجع نفسه.

مصدر مطلع جدا قال لبابوبي أن بودريقة بعد هاد المرحلة طمع ومشا بعيد ووصل أنه غير وبدل القانون الأساسي للفريق، باش يتحكم فالهبة الملكية، وهي القطعة الأرضية المشهورة، وبطبيعة الحال كان كيصرف أموال طائلة، جدا جدا. مكاين غير جبد، وهادشي علاش لقى راسو فأزمة، وبدا يكذب ويكذب ويكذب على الجميع، اللاعبين والمستخدمين والممونين والناس كاملين ممخلصينش ففلوسهم، وبودريقة باقي كيدوي على شي أكاديمية كبيرة غتكون مفخرة ديال للرجاء، من المفخرة إلى التبهديلة.

فهاد الظروف كاملة أوزال وصحابو لقاو الفرصة مواتية باش يرجعو للعبة، ويسترجعو الفريق، واعتمدو على أخطاء لسان بودريقة، وبخاصة فاش قال “واش حنا فسوريا”، ملي كان كيتكلم على انتصار (مشكوك فيه) للوداد على مولودية وجدة، وزاد غرق الشقف فاش شدوا على شي تواطؤ ديال الجامعة واتهمها أنها باغية تعطي اللقب للوداد.

أوزال واللي معاه مالقاوش أحسن من حسبان، على أساس أن يحصل على الرئاسة، لأنهم لم يكونوا يضمنون ذهاب بودريقة، وكل المنخرطين بين يديه. مصدر مطلع قال لبابوبي أنه فاش غيمشي بودريقة، غادين يجيبو اسم كبير ياخذ الرئاسة من بعد حيت ماكيتيقوش فحسبان والذمة المالية ديالو محل شك، وعندو مشاكل مع الداخلية فالتدبير المالي لمقاطعة الفداء درب السلطان.

السبور والبوليتيك

مسألة أخرى خاص الجمهور ديال الرجاء يعرفها وهي أن حسبان توافق مع بودريقة باش يعطيه تبرئة الذمة المالية مقابل الرئاسة، وباش منكروش الخير بودريقة فاز مع الرجاء بألقاب، ودار مشروع بناء الأكاديمية، غير فالحساب السياسي بدا يقربو من العدالة والتنمية، ويدخلو فحرب تخلط فيها السياسي بالرياضي مع الوداد وفرق أخرى.

وعلى هادشي ديال السياسية والرياضة اللي ولى معروف هاد الأيام، بابوبي اتصلت بالمحلل السياسي عمر الشرقاوي وسولاتو على رأيو فالمستجدات وقال ” خاص ضروري نعدلو أولا قانون الرياضات ويتمنع هاد تضارب المصالح وحالات التنافي اللي المشهد الرياضي ديالنا عامر بيها، وبعدما كانت الدولة هي اللي كتحكم فالرياضات وخصوصا الكرة ولات الأحزاب اليوم داخلة فالرياضة، ولكن فالمغرب محتاجين لعلمانية رياضية واللي كنقولو للبيجيدي على استغلال المساجد خاصو يتقال لجميع الأحزاب على الملاعب”.

حسبان رئيس؟ الرجاويين مرضاوش

الرجاويين طالع ليهم الدم وزاد رمضان حرق أعصابهم كثر بعدما نزل عليهم خبر انتخاب حسبان لقيادة سفينة الفريق، الرئيس الجديد لفريق الرجاء منتخب سابق، وسبقلو كان رئيس مجلس عمالة الدار البيضاء، ترشح للانتخابات البرلمانية السابقة باسم السبولة الذي كان يقوم بمهمة منسق جهوي له فكازا وتگردع. وداز حسبان رئيس مقاطعة الفداء والفترة اللي كان فيها عرفت موجة احتجاجات فصفوف مستشاري الأغلبية والمعارضة معا. حسبان اللي مازال كيسير المحل ديال الوالد ديالو “سيارة التعليم حسبان” فحي الأمل هو الشخص اللي حول مقرات “شرطة القرب” المهملة في عمالة الفداء إلى مراكز لتصحيح الإمضاءات، صاحب مقولة “مخطط مارشال” على الطريقة الكازاوية، محب السيكار، كياكل بزاف وعزيز عليه “الويسكي” غير فيه ديفووات كثار، بينهم أنه حاس براسو طاووس ونخوة على لخوا.

واحد الرجاوي ولد درب السلطان اعتبر أن أيام إعلان إفلاس الفريق أصبحت معدودة، خصوصا أن السيد معندو ميعطي( يقصد حسبان)، بل إنه كرش بلا ضلوع ومداخلش على الفرقة بشي دعم مالي باش ينقذ الفرقة من الأزمة. ويقسم هذا الرجاوي الشيخ بأن مؤسسي فريق الرجاء الذي رأى النور بالمنزل رقم 80 الكائن فزنقة العباسيين بدرب كلوطي في عمالة الفداء لو كانو يعتقدون أن الفريق سيؤول لحسبان لراجعو حساباتهم ساعاتها. “كون كان سي حجي بن عبادي والبوعزاوي العشفوبي وكريم حجاج عارفين أن الفرقة غادي تتبهدل في آخر آيامها كون ما أسسوس الرجا” يضيف الشيخ متأسفا.

مؤطر: الجمع العام للقوالب

مراسيم صفقة تدواز الراجا من بودريقة حسبان تمت فقاعة مخنوقة ما فيها لاريزو لا ويفي لا كليماتيزور وجمع عام فيه الطايح كثر من النايض واتهامات بين بودريقة ومعارضيه القلائل، اللي مكالو والو مع الطعارجية ديال بودريقة، اللي دوز ليه التقرير المالي صحة بالرغم من الفضايح الكثيرة، وعطاو الفريقة لسعيد حسبان عضو حزب الحركة الشعبية فصفقة تاريخية يعني بالعربية تاعرابت بودريقة غرقها وتفك منها ولصقها فمول سيارة التعليم على الله وعسى تعاود ترجع الراجا للفراجة.

المضحك فجمع الراجا هو التدخل ديال عادل با معروف، اللي سحب الترشيح ديالو للرئاسة وقال فالحديث ديالو أن بودريقة مات شحال هادي وأن الجثة ديالو هي اللي كاينة اليوم فالجمع العام. التصريح ديال عشير بودريقة فالسيمة والياجور وداكشي، ضحك العديان ديال بودريقة وبكى الطعارجية اللي كانو فداك الكراج اللي داز فيه الجمع العام غير العادي بالمرة.

بودريقة دربها بسلتة واعرة مباشرة بعد شبه المصادقة على تقريره المالي وغبر ليه الأثر من القاعة. طفا التليفونات ديالو وخلا الوصية مع الطعارجية ديالو. وصية تنفيذ مضامين الصفقة التي تمت بينه وبين حسبان حيت كان خايف يشدها واحد اخر ويولي فارش كلشي.

في الجهة الأخرى بقاو الوداديين مقابلين الجمع ديال الراجا وملي شافو بودريقة كيتعاير تشفاو فيه مزيان فالفايسبوك وصفاو معاه الحساب ديال الأرنبات وداكشي اللي كان كيقول عليهم فالراديوات والتلفازات.

حسبان، اللي كيشبه بزاف لبودريقة فالفورمة، غادي يكمل داكشي اللي خاص الدار البيضاء. الوداد شادها التراكتور فشخص الرئيس سعيد الناصيري ومجموعة من الأتباع ديالو، والراجا اليوم ولات سبولة مع سعيد اخر وهو حسبان. وهادشي علاش الوداديين كيقولو هاد العام غادي يكون الحصاد مزيان بمعنى أن التراكتور غادي يجمع حب وتبن مع السبولة. المهم هاد العام غادي تكون الفراجة مع سعيد مول التراكتور وسعيد مول السبولة. فرجة سعيدة.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *