الفلاحة كيتسانو إعادة جدولة الديون

الفلاحة كيتسانو إعادة جدولة الديون

عادل نعيم

بعد العام اللي داز، بزاف من الفلاحة ما عندهم باش يبداو الحرث..حيث محصول ديال الحبوب كان تراجع من 115 مليون قنطار إلى 33,5 مليون قنطار.. وفهاد ليام بدات القرض الفلاحي والفيدرالية المغربية للفلاحة والتنمية القروية، على الفلاحة باش يستمعو للهموم ديالهم فهاد الموسم الفلاحي، وبان أن الفلاحة باغين إعادة جدولة الديون ديالهم اللي واخذيناها من عند القرض الفلاحي، وإعفاءهم من الفوائد الناتجة عن التأخير فأداء أقساط القروض.. هذا ما كان.. القرض الفلاحي مازال ما عطى حتى شي وعد، علاش؟ لأن المؤسسة البنكية مملوكة للدولة وأي قرار ديال إعادة الجدولة خاص تاخذو الحكومة.. يعني أن القرار سياسي. إذن الكرة فمرمى الحكومة، لكن القرض الفلاحي اللي عندو ما يكفي من السيولة، حسب مصدر من الفلاحين، ممكن فانتظار قرار الحكومة، يقدم تسهيلات فتمويل الموسم الفلاحي المقبل، حيث الفلاحة خاصهم يشريو البذور والمصاريف ديال الحرث، ويتسناو الشتا.. بزاف ديال المزارعين عبرو فاللقاءات، اللي عقدوها مع القرض الفلاحي، على ارتفاع السعر ديال الطاقة، من بعد ما قامت الحكومة بتحرير السعر ديال ليسانس والمازوت.. الشي اللي انعكس سلبا على المصاريف ديالهم.. المهم دابا الحكومة الجاية قدامها ملف ساخن، خاصها تاخذ فيه قرار، وإلا غادي يكون العام الجاي كارثي على بزاف ديال الفلاحة، خاصة أن أغلبيتهم صغار، على اعتبار أن 85 فالمائة منهم، ما كتعداش المساحة اللي كيزرعوها 5 ديال الهكتارات. دابا خاص الحكومة توضح الرؤية للمزاعين، باش يتوكلو على الله ويبداو فالحرب فالأسابيع المقبلة، خاصة إيلا بانت الشتا، علما أنه بسبب تراجع المحصول والجفاف تراجع النمو الاقتصادي ل 1,4 في المائة، حسب بنك المغرب، وفقد العالم القروي 175 منصب شغل، حسب المندوبية السامية للتخطيط. لكن ماشي غير مزارعي الحبوب اللي محتاجين الدعم، راه حتى اللي كيديرو الخضر والفواكه، اللي بالإضافة لقلة الأمطار، تزادت عليهم الحرارة المرتفعة فهاد الصيف، الشي اللي غادي ينعكس على جودة المنتوجات ديالهم، خاصة أنهم موجهين للتصدير.. دابا كلشي كينتظر القرار ديال الحكومة حول إعادة جدولة الديون.. وكل الأحزاب مادواتش على هاد الأمر خلال الحملة الانتخابية.. ووزير الفلاحة عزيز أخنوش، سكت فالفترة السابقة، حيث خاف يقولو ليه مشارك فالحملة ويعتابروه من العفاريت والتماسيح.

مقالات ذات صله