بنعبدالله: أنا ماقلت والو. والو. ما قلت والو

بنعبدالله:  أنا ماقلت والو. والو. ما قلت والو

بابوبي: كي بقيتي أسي نبيل من لخلعة ديال بلاغ الديوان الملكي؟

نبيل بنعبد الله: حتى حمدنا الله وشكرناه سيفط لينا مسيرة ولد زروال تنسي الناس فهاد لكارثة ونتا جاي تفكرني عاوتاني. را كلمة وحدة قلتها أنا ما قلت والو..والو ..والو صافي؟

بابوبي: قلتي قالاك ما قلتيش..واش باغي تقول باللي الديوان الملكي كيكذب؟

نبيل بنعبد الله: هدا هدا هدا ما واش أنا باقي ما تفاكيت مع الموصيبة لولا باغي تلصق ليا موصيبة خرا.. هذاك أسي بابوبي الديوان ديال سيدنا علينا وعليك بالإحترام ديالو ما يمكنش ليه يكذب.

بابوبي: ولكن نتا قلتي لجريدة “الأيام” أنكم ما عندكمش مشكل مع الأصالة والمعاصرة، ولكن عندكم مشكل مع شي وحدين كيوقفو وراهم هوما المسؤولين على التحكم؟

نبيل بنعبد الله: أودي الله يلعن بو الشراب، هاداك النهار اللي قلتها كنت ضارب شي كويسات وشدني الحماس ديال الحملة الإنتخابية بغيت ندير فيها واعر، ساعة جبتها فراسي. حتا سحيت عاد قالو ليا راك قفرتيها ونضت درت إعتذار. أنا ما نقدرش على الغضبة ديال سيدنا و ديوان سيدنا.

بابوبي: هي ما كاين لا تحكم لا والو غير طالقينها علينا وصافي؟

نبيل بنعبدالله: ولاش تصلاحو؟ إلا ما طلقناهاش عليكم على من غادي نطلقوها لمرة اللي فاتت قلنا ليكم محاربة الإستبداد والفساد تيقتونا وصوتو علينا وما درنا ليكم والو. هاد لمرة غادي نبدلو عليكم الأغنية ونديرو ليكم التحكم ومع نتوما حيت نية غادي تيقو بنا وتصوتو علينا مرة خرا.

بابوبي: ولكن الحليف ديالك بنكيران باقي كيقول كاين التحكم؟

نبيل بنعبد الله: أودي ما كاينش اللي خرج علي قد هاداك بنادم بقيت تابعو فهاداك التخراف ديالو حتا جبتها فراسي. هاداك يالاه حطاتو الوقت ماعارفهاش باش منفوخة، أنا ولد المخزن كليت وشربت معاه من 2002 دارني وزير لهضرة، سيفطني سفير للطاليان، مشيت للحج بسبابو ونجي دابا نسبو، أنا مع بنكيران فالحكومة ديال سيدنا، ولكن باش يبقى يقول ليا التحكم والله لا باقي قلتها وراه.

مقالات ذات صله