حميد شباط: غادي نفرق البترول على لمغاربة

حميد شباط: غادي نفرق البترول على لمغاربة

بابوبي: سي شباط علاش خرجتو من الحكومة، واش ناوي تحالفو مع العدالة والتنمية إيلا جات هي لولا؟

حميد شباط : خرجت من الحكومة حيت بنكيران مابغا يعطيني حتى وزارة، واش أمين عام ديال حزب الإستقلال وماعندو حتى وزارة ما شي معقول، وغادي نتحالفو مع العدالة والتنمية هاد المرة  إيلا عطاوني وزير الخارجية.

بابوبي : وعلاش بغيتي وزير الخارجية؟

حميد شباط: باش نطالب إسبانيا بسبتة ومليلية، والجزائر ترد لينا تلمسان ديالنا، والله يجعلها نوضوها معاهوم باش ما بغاو.

بابوبي: فهاد الحملة الانتخابية شفناك مصور مع مول شفنج مول رايب مول الفران، اش بغيتي تقول بهاد التصاور؟ واش هادي ماشي شعبوية؟

حميد شباط: أنا شعبي ماشي شعباوي وإيلا طلعت رئيس الحكومة غادي  نطلع الشعب معايا، داكشي علاش بديت الحملة الإنتخابية مع الطبقات الشعبية، ثم أن هاديك الصور هي رسائل سياسية لمواجهة التحكم اللي مقدراتش العدالة والتنمية تواجهو.

بابوبي: وإذا جات الأصالة والمعاصرة هي لولا  واش غادي تحالف معاهم؟

حميد شباط: بطبيعة الحال غادي نتحالف معاهم حيت عندنا برنامج مشترك لتقنين زراعة الكيف، ولكن غادي نتحالف معاهم إيلا عطاوني وزير الداخلية.

بابوبي: شناهي الوعود، اللي كتواعد بها المغاربة إيلا طلعتي رئيس الحكومة؟

حميد شباط: أولا غادي نقضي على البطالة وكولشي غادي يولي خدام اللي عندو الدبلوم واللي معندوش، ثانيا غادي نزيد فنسبة النمو، حيت غادي نقنن زراعة الكيف وغادي تولي عندنا ضريبة على الحشيش، تالثا غادي نديرو تنقيب على البترول والغاز طبيعي وغادي نفرقوه على المغاربة.

بابوبي: اش بان لك فهاد المونيكات اللي خرجوهم الشينوا فدرب عمر؟

حميد شباط: هاد المونيكات هما ضد توابت الأمة وغادي يخرجو لينا  على ولادنا وإيلا وليت رئيس الحكومة غادي نمنعهم.

بابوبي: وشناهو البديل لهاد الكبت اللي كاين؟

حميد شباط :  البديل هو أننا نرجعو كيف يام زمان وننظمو الموسم ديال زواج ويكون صداق فيه غير ب-1000 درهم رخص من المونيكات كاع.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *