شكون رئيس الحكومة؟

شكون رئيس الحكومة؟

بابوبي 

رئيس الحكومة واش غيعاود

هادي شي يوماين قال الأمين العام لحزب العدالة والتنمية،عبد الإله بنكيران، أنه غادي يستمر فنفس الطريق اللي بداه مع الحكومة الحالية إذا اختارو الملك مرة أخرى رئيس للحكومة.. يعني الراجل عارف أش كايقول ومصمم على داكشي اللي فراسو وداكشي اللي بداه.. والدليل على هادشي اللي كنقولوه هو تصريح بنكيران لوكالة الأنباء البريطانية فاش قال ليهم إذا زدت ولاية أخرى فالحكومة غادي نرفع الدعم على “البوطا” وهو اللي فسروه بعض السياسيين أن بنكيران كيطلب الرضا ديال صندوق النقد الدولي.. اشنو بدا بنكيران باش يستحق يزيدوه المغاربة اللي كيصوتو ولاية جديدة..

الصفحة الرسمية ديال البيجيدي دارت هادي شي شهر حملة سماتها “حصيلة حكومة بنكيران” وتكلمت فيها على جميع إنجازات الحكومة (اللي كيشوفوها غير البواجدة طبعا)، وركزت على داكشي ديال “إصلاح” صندوق التقاعد وصندوق المقاصة، وباش يجيبو “الكاو” جبدو أهم “إنجاز” عندهم واللي هو (رفع الحكومة للحد الأدنى للمعاش من 1000 إلى 1500 درهم على ثلاثة مراحل ما بين فاتح أكتوبر 2016 وفاتح أكتوبر 2018.)

بنكيران رجل كيتكلم بزاف وفكل مرة تكلم فيها على تجربتو فرئاسة الحكومة، فهاد الخمس سنين كيذكر بلي هو “مجرد رئيس حكومة”؟؟؟ وأن الملك هو رئيس الدولة الحقيقي وهو غير كينفذ، وهادي أول حاجة خلف فيها الوعد ديالو حيت الدستور عطاه شي صلاحيات وهو تخلى عليها وحتى حد ما قاليه تخلى عليها. الملك براسو خطب كيقول اخطيوني عليكم وخرجوني من الصراعات ديالكم وبصيغة أخرى بلا متبقا تلصق فيا ا بنكيران الفشل ديالك.

منسيناش عفا الله عما سلف

المغاربة كاملين شافو كيفاش بنكيران بنى الحملة الانتخابية ديالو على بزاف ديال الوعود أهمها أنه غيدير تدابير اجتماعية لمساعدة الفقراء ومحاربة الفساد، ولكن مع الوقت غادي يولي بنكيران صديق “الفساد” حيت دار معاه السلم والهدنة من نهار حطو يديهم فموضوع لاكريمات وموضوع دفاتر التحملات وهي الملفات اللي كانوا كيقولو لينا أنها رأس “الفساد”، بنكيران غادي يرتكب أول أخطاِئه المباشرة فاش غادي يخرج عند المغاربة ويقول ليهم أن برنامجو الحكومي كيقوم على قاعدة “عفا الله عما سلف”، ونسا أنه كذب على الناخبين ملي رفع شعار “إسقاط الفساد والاستبداد”.

المغاربة ميمكنش ينساو كيفاش تحالف بنكيران مع حزب الحمامة وبالضبط مع صلاح الدين مزوار اللي دخل للحكومة براسو مرفوعة وبشروطو وخدا وزارات مهمة بزز من بنكيران، واخا كانت “الحرب الحزبية” نايضة بين الحمامة واللامبة، فاش عبد العزيز أفتاتي فركع موضوع العلاوات “اعطيني نعطيك” فالبرلمان واتهم مزوار اللي كان وزير المالية في حكومة عباس الفاسي بانه استفد من تعويضات خيالية بلا قانون، وطالب افتاتي بالمحاكمة ديال مزوار ويرد لخزينة الدولة داكشي اللي سماه “تعويضات غير قانونية وبطرق غير قانونية” ووصلت القضية حتى للأخلاق فاش قال عليه”الرجل اللي مكيحشمش”، ولكن فاش خرج شباط ومعه ستة ديال الوزراء استقلاليين من الحكومة (باستثناء الوفا طبعا اللي عارف اش كاين وجاوب شباط وقال ليه أنا مخدامش معاك أنا خدام مع سيدنا)، اضطر بنكيران ينسى الفساد وحتى افتاتي معاه ويمشي يحط العار عند مزوار باش ينقذ ليه الحكومة وضحا بالأخ العثماني وعطا بلاصتو لمزوار “اللي مكيحشمش وخاصو يتحاكم”. اللي تحاكم فالحقيقة هو الموظف اللي خرج الخبار للصحافة وبنكيران والرميد مقدرو يديرو والو لواحد السيد تعاون معاهم فبرنامج واعدو بيه الناس.

كلشي ممكن وتحلا المعاودة

ولكن واش بنكيران كامل خايب وصافي تحرق ومايمكنش يكون رئيس حكومة؟؟ أغلب المحللين كيعتبرو باللي شعبية بنكيران هي السبب الرئيسي فنجاح حزب “العدالة والتنمية”، واخا ما حقق حتى حاجة واعد بها فالحملة الانتخابية ديالو.

بنكيران هو أول رئيس حكومة كيدوي بزاف وعندو قدرة على التواصل بسهولة مع الشعب وكلامو فيه بزاف ديال الشعبوية. ومن ديما لاعب فالتواصل على أن البيجيدي حزب نظيف (طبعا نظيف حيت عمرو ما حكم) وحتى المغاربة صوتوا لبنكيران وصحابو فـ 2011 حيت اعتقدوا نهم ماشي بحال لوخرين وأنهم باغين التغيير.

هادشي إذا زدنا عليه الانضباط التنظيمي ديال “البواجدة” والإخلاص اللي معندش الأحزاب الأخرى، والاستفادة ديالهم من الفترة اللي كانوا فيها فالحكومة، زيد على هادشي أن البيجيدي حتى وهو فالحكومة دار بعض المرات المعارضة خصوصا وأنهم عندهم أكثر من مية مقعد فالبرلمان وهاد العدد حسب أغلب الخبراء مايمكنش يطيح بنسبة كبيرة بزاف، هاد الحسابات مجموعة ممكن تخلينا نقولو أن بنكيران قريب من ولاية أخرى ويقدر يكون هو رئيس الحكومة الماجية، وهو براسو باغي هادشي من قلبو وعليها تقلب على شعار الديموقراطية الداخلية وعقد مؤتمر استثنائي أجل فيه المؤتمر العادي وزاد مدد فيه الولاية ديالو فالأمانة العامة ديال الحزب أخيرا اشناهو البيجيدي بلا بنكيران؟؟.

إلياس العماري واش أنت هو؟

العماري الأمين ديال البام قال مباشرة من بعد الانتخاب ديالو أنه ماكيفكرش فرئاسة الحكومة الجاية حيت هو انتخب أمين عام للحزب وماشي رئيس للحكومة، ولكن العماري عودنا أنه واخا كيقول مبغيتش شي حاجة كياخدها كيما صرح من قبل وقال مبغيتش نكون أمين عام وهاهو أمين عام.

هاد الكلام ديال مبغيتش نكون رئيس حكومة باينة غير خطة سياسية عند الثعلب، حيت فاش جا إلياس العماري، يقدم البرنامج الانتخابي ديال البام قال حنا جينا باش نقذو البلاد من الوضع اللي وصلت ليه بعد ولاية حكومة بنكيران. وزاد قال أنه غيحاول يرجع الأمور إلى نصابها في المجال الاقتصادي والاجتماعي، وقال بالدارجة: “غادي نحاولوا نرجعوا التران للسكة لأنه خرج عليها”.

الخطة “عميقة” ومدروسة

إلياس اللي مسبقلوش قبل انتخابات 2016 سير شي جماعة ولا كان فالبرلمان، مباشرة بعد انتخابو رئيس لجهة طنجة تطوان الحسيمة، بدا كيركز على المشاريع الاقتصادية ومنها قصة 300.000 منصب شغل اللي مازال المغاربة كيتساءلو على اش طرا فهاد الوعد، وهو كيوجد راسو من نهار خرج مجموعة إعلامية فيها جرائد ومجلات لرئاسة الحكومة وهادشي علاش كيشبهوه ببرلسكوني.

الخصوم ديال العماري كينسبو ليه بزاف ديال المشاكل وكيعتبرو أنه كيمثل التحكم والمخزن والدولة العميقة، وأي مشكل كتوقع للبيجيدي خصوصا بحال هادوك الفضائح ديالهم قالو أن العماري هو اللي من موراها.

خصوم اخرين انتقدو تصريحات العماري اللي اعتبروها مبالغ فيها، منها وعدو بأنه غيغير المغرب فمائة يوم وهادي شوية زايد فيها الثعلب، العماري قال في حوار مع مجلة “لا ديبيش” أنه غادي يقلص عدد وزراء الحكومة الجاية فاش غيولي رئيس لـ 24 وزيرا وغادي يدير المناصفة بين الجنسين فالحقائب الوزارية، هادشي كيفكرنا بوعود بنكيران باعاادة الاعتبار للمرأة وهو يدير وزيرة وحدة فحكومة بنكيران الأولى (حكومة ميدلت).

إلياس العماري الثعلب كيفما سماوه محللين صحافيين الأمين العالم ديال حزب الأصالة والمعاصرة واللي هو أكبر منافس للعدالة والتنمية، حتى هو كينشر التقييم ديالو للحصيلة الحكومية فتسيير المغرب لخمس سنوات، وحتى هو باينة ليه يكون رئيس الحكومة المقبل.

الباميين.. وعلاش لا

العماري حسب ما قال عليه عبد اللطيف وهبي فحوار مع جريدة المساء أنه من حقو يكون رئيس للحكومة، أولا لأنه الأمين العام ديال حزب الأصالة والمعاصرة وهو الحزب الثاني حسب اخر انتخابات، وثانيا حسب وهبي فالعماري “عندو تصورات وافية على الساحة السياسية، وكيعبر عليها بكل صراحة بلا مراوغة كيما كيديرو لوخرين…”

عبد اللطيف وهبي وصف إلياس العماري بالرجل اللي كيملك قوة شخصية وذكاء كبير، وعندو قدرة كبيرة على التأثير فالمجال السياسي وفالفاعلين السياسيين بمواقفه، وكيفكر بسرعة، وكيحلل بسرعة”.

العماري قبل الحملة بشوية قال غادين ياخدو المرتبة الأولى، والحزب راه حط خطة مدروسة باش يغطي جميع الدوائر الانتخابية فالمغرب، واثق من راسك شكون قالهالك أ الثعلب؟؟

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *