… شكون كيحكم لبلاد؟

… شكون كيحكم لبلاد؟

بابوبي

فبوزنيقة السيمانة اللي فاتت، قال بنكيران بلي كاين جوج دولات فالمغرب، وحدة كيقودها الملك، والأخرى مكنعرفوش شكون غادي بيها، ولا منين كتجي القرارات ديالها، ولا منين كتجي التعيينات ديالها. هاد الكلام ماشي أول مرة كيتقال، بنكيران من نهار جا وهو كيتشكى من العفاريت والتماسيح اللي مخلاوهش يخدم، وفالحقيقة كان باغي يقول التماسيح والعفاريت اللي كيخدمو بوحدهم، وأخيرا بدا كيستعمل مصطلح جديد هو «التحكم».. هادشي ماشي جديد فالمغرب راه سبق لليوسفي قالها، وقال بلي كاين شي قوة أخرى ما كتظهرش للعموم، مكتخليش الحكومة المنتخبة تخدم. واش المغرب فيه جوج دول أو أن المغرب فيه فعلا التماسيح والعفاريت؟   

الحقيقة بعد خمس سنين من (الربيع العربي)، هي أن المقربون من الملك فالمغرب كيحكمو البلاد فالاقتصاد فالإعلام فالسياسة، ضروري تلقاهم وفكل مرة كتوقع شي مواجهة بينهم وبين بنكيران، كيبان للمغاربة أنهم أقوى من الحكومة اللي صوتو عليها، مرة كيكونو أفراد ومرة كيكونو رؤساء مؤسسات أو حتى وزراء، اللي مهم هو أن هاد الحكومة الخفية كتسيطر على أهم المجالات.

فالواقع هادشي كيضر بالسياسة، ولكن كيفاش قدرو هاد الناس يحكمو فعلا البلاد وحنا كنقولو عندنا أحزاب ومؤسسات ومجتمع مدني؟؟ السبب البسيط هو أن هاديك الحكومة المنتخبة ضيعت أهم فرصة كانت فيدها هي فرصة تطبيق الدستور ديال 2011، والاستفادة من صلاحيات الحكومة والرئيس ديالها، وهكذا بحال إلا متغير والو فالمغرب. هادي أسماء الشخصيات اللي بابوبي كتعتبرهم هوما اللي كيحكمو البلاد.

عالي الهمة أكبر مستفيد من 20 فبراير

مباشرة بعد الخروج ديال حركة 20 فبراير اختفى فؤاد عالي الهمة من القصر لمدة شهور طويلة، والسبب هو أنه مكانش باغي النفوذ الاقتصادي ديال القصر يخسر ليه الخدمة اللي دارها فالسياسة، وقال إذا بقى الوضع هكذا مايمكنش نحافظو على التوازن السياسي. فالحقيقة كانت حرب بين فؤاد ومنير الماجيدي، والهمة انتصر فالأخير.

بسبب الاسم ديالو اختارو الحسن الثاني يقرا مع ولي العهد الملك الحسن عجباتو “عالي الهمة”، ولكن كان كيقراها بالفرونسي، لأن الاسم الحقيقي ديال هاد الرجل الغامض والقوي هو “عالي الحمة”. فؤاد اللي كتجمعو صداقة قوية بالملك محمد السادس، ملي كانو صغار فالمعهد المولوي، ولد الرحامنة وخدم وزير منتدب فالداخلية من 9 نونبر 1999 حتى ل7 غشت 2007، كان برلماني على بنجرير ومن بعد أسس البام، ولكن مكملش فيه حيت ولا مستشار ديال الملك. اللي مكيعرفوهش بزاف ديال الناس أن الوالد ديال الهمة نقابي معروف وأهم حاجة أنه كان نقابي ومقرب بزاف للاتحاد الاشتراكي.

فؤاد هو اللي هندس اللقاء مع بنزكري والعودة ديال السرفاتي والخروج ديال عبد السلام ياسين من الإقامة الجبرية. باش كيحكم الهمة ؟؟ بزاف ديال السياسيين المغاربة كيعرفو مزيان بلي المرور إلى السلطة مايمكنش يكون إلا على يدو وبزاف ديال المعارضين كبار اجتمعو بيه فالسر وفالعلن، وهو اللي حدد بزاف ديال الأمور فالسياسة المغربية فالعهد الجديد منها أنه بزاف ديال الوزراء فحكومة عباس الفاسي ولاو وزراء بعد زيارة صخور الرحامنة

الماجيدي مول باناما

مايمكنش يتذكر اسم فؤاد عالي الهمة بلا مايتجبد اسم محمد منير الماجيدي، كاتب الملك اللي بانت القوة ديالو ملي عرف كيفاش يعطي واحد الشهرة كبيرة لمهرجان العاصمة “موازين” حيت هو رئيس جمعية “مغرب الثقافات” اللي كتنظم المهرجان واللي كيتقام بالملايير. بزاف ديال صحابو كيعيطولو M3 وبفضل  الفن وموازين الماجيدي حتى هو، قدر يقرب أكثر من الملك، خصوصا وأن العائلة الملكية كيعجبهوم موازين وكيحضرو فأكبر السهرات، وبالرياضة حتى هي الماجيدي اليوم كيحقق مع نادي الفتح الرباطي نتائج كبيرة كيقوي بها النفوذ ديالو.

ولكن واش باقي الماجيدي بهاد القوة؟؟  الماجيدي كان أكبر خاسر من 20 فبراير لأن اسمو كان كيتعلق فاللافتات والمتظاهرين كيطالبو بطردو، وحيدو ليه بزاف ديال السلطات بحال موازين اللي خداه احيزون (ها حنا جايين لأحيزون). أهم ضربة جات فالماجيدي هي أن اسمو يخرج فوثائق “باناما”، حيت عندو شركات مسجلة فالجزر اللي معروفة بتسهيل التهرب الضريبي، الوثائق بينت أنه كاين شي شركة المقر ديالها فاللوكسمبورغ، واللي راس المال ديالها 40 مليار وشرات عقارات وباطو مسجلاهم باسم الملك محمد السادس، الملاحظة أن الفضيحة ديال باناما بردت بسرعة، ربما حيت الماجيدي هو اللي مسيطر على الإشهار فالمغرب من البانوات اللي فالشوارع، حتى للجرائد، إذا ما رضاش عليك الماجيدي والله لا خديتي الإشهار وهادي من أهم الحاجات اللي كيحكم بها الماجيدي.

اخنوش الوحيد اللي فلت من صحاب البصري

الرجل الوحيد اللي صنعو البصري وقدر يخرج بلا مشاكل من مرحلة تصفية الحساب مع البصري وصحابو، النفوذ ديالو جاي من بزاف ديال المواقع، زيد الفلوس اللي عندو واللي كيتصنف بها فأغنى أغنياء المغرب وإفريقيا، مسائل حساسة كيتحكم فيها اخنوش، أولا عندو “كروب كاراكتير” وهو اللي كيخرج واحد الجريدة أسبوعية سميتها “لافي إيكو” وهي اليوم أهم مرجع عند موالين البيزنس والاقتصاد، وإذا عندك الفلوس ضروري تقرا “لافي إيكو”. القوة ديال أخنوش جات فاللحظة اللي احتكر توزيع المحروقات بعدما باعت ليه شركة “سوميبي للمحروقات”، اللي كانت كتملكها عائلة الملياردير مصطفى امهال فواحد الصفقة خطيرة، وهكذا ولى اخنوش كيملك الحق فتوزيع المازوط فالمغرب بلا تبرزيط، اخنوش صديق العائلة الملكية والملك وعائلتو كيمشيو يفطرو عندو فرمضان. مراتو هي مولات موروكو مول، وهو شخص معروف بالسخاء ديالو وهادشي كيعطيه قوة ونفوذ، وكيقولو باللي اخنوش هو اللي مور المشروع ديال التلفزة اللي كيوجدها مول جريدة الأخبار رشيد نيني.

الفاسي الفهري الفاميلة هي السر

الطيب الفاسي الفهري هو الرجل الوحيد اللي من حقو يتصرف كيفما بغا فملف الصحراء، طبعا هاد النفوذ جابو من عند الملك، حيت هو فاش مبقاش وزير ولى مستشار مكلف بالديبلوماسية. الطيب الفاسي الفهري اللي عائلتو عندها علاقة مع الملوك العلويين هادي أكثر من جوج قرون، زادت القوة ديالو ملي خرج العمراني الوزير المنتدب فالخارجية اللي كان مع سعد الدين العثماني، جا الطيب الفاسي الفهري وطلع ناصر بوريطة الرجل ديالو فالخارجية لمنصب وزير.

العلاقات العائلية ديال الفاسي الفهري قوية بزاف، ومراتو اللي مدت يديها حتى للسياسة الخارجية ديال البلاد وطردت نبيل بنعبد الله سفير المغرب فالطاليان، بعدما شعلات بينها وبين مرات بنعبد الله. ولدو هو إبراهيم الفاسي الفهري، اللي كينظم منتدى أماديوس، وكيقولو بلي فاش سي إبراهيم كيحتاج شي حاجة وزارة الخارجية كاملة كتخدم معاه، بحال إلا وزارة الخارجية تابعة للمستشار وولدو.

حفيظ العلمي ايمانويل ماكرون المغربي

فعام 2008 ناضت بين جوج ديال الناس فكازا، واحد فيهم كان هو ولد الفشوش ديال مولاي حفيظ العلمي، الولد عيط على باه وجا حفيظ شخصيا لموقع الصداع وبدا يغوت على الخصم ديال ولدو وهو يسولو “شكون أنت؟” الرجل اللي عاد كيتعلم العربية ورئيس الاتحاد العام لمقاولات المغرب سابقا جاوب بصوت مرتفع “أنا هو اللي كنحكم المغرب”. مول العينين زورق باغي يولي إيمانويل ماكرون ديال المغرب كيتشبه حفيظ العلمي بوزير الاقتصاد الفرنسي وهو اليوم أسس واحد الجمعية، بحال شي مؤسسة ديال التفكير كيقولو إنها غادي تحول لحزب سياسي، غادي يجي ما بين الإسلاميين والحداثيين، وعلى عكس كل رجال الأعمال فالعالم الثروة ديال العلمي “اللي رفض أنه يتخلص على العمل الحكومي ديالو “الوزارة اللي دخلها حفيظ العلمي من بعد التعديل الأول فحكومة بنكيران، ساهمت بشكل كبير فتضخيم ثروة الرجل.

الشرقي الضريس فين ما مشيتي تلقاه

فاش تعين الشرقي الضريس مدير عام لإدارة الأمن الوطني، كانت فترة العمل اللي جمعتو مع فؤاد عالي الهمة، وياسين المنصوري، فاش كان والي للشؤون الداخلية فوزارة الداخلية، هي السبب فالانتباه ليه.

ولكن القوة ديال الضريس والثقة الكبيرة اللي خلاتو يكون هو الوزير الفعلي للداخلية فحكومة بنكيران، جات من التكليف ديالو بملفات معقدة مزيان، الشرقي الضريس داز والي فالعيون وعرف كيفاش يتحرك فبزاف ديال الملفات، وملي خدم الشرقي الضريس عامل مدير للولاة كان كيتواصل بشكل خطير ومستمر مع المسؤولين فالداخلية، رجل ثقة القصر وكيقولو بلي هو من الوزراء اللي مكانش بنكيران عارفهم غادين يكونو معاه فالحكومة. بنكيران خاض واحد المعركة خفية ضد الضريس فاش انتقد تدخل قوات الأمن بعنف ضد شي متظاهرين سلميين ووصل الموضوع أن الرميد جا واعتذر ليهم، ولكن الضريس متزعزعش على الموقف ديالو. باش تعرفو الضريس قوي هو الوجود الدائم ديالو فتعيينات العمال، خصوصا فالمناطق الحساسة وبعض المرات كيظهر الشرقي الضريس فمناسبات ماعندها علاقة بالداخلية بحال الثقافة والرياضة، ولكن من وسط الداخلية مصادرنا قالت الضريس كيخلي مراكز النفوذ فكل بلاصة داز منها وهو صلة الوصل بين الداخلية وبزاف ديال القطاعات منها الأحزاب اللي كتشاور معاه فيما يخص التحالفات بيناتها وهادشي كيعرفوه بعض القادة السياسيين.

مريم بنصالح  الباطرونة

مزوجة من رجل الأعمال جمال شقرون ولد الممثلة أمينة رشيد، وهي مولات شركة “والماس” اللي خلاتها تحتكر سبعين فالمائة من السوق الوطني للمياه المعدنية، باها ديال بنصالح كانت عندو علاقة مع امبارك البكاي أول وزير أول فتاريخ المغرب الحديث، وهو اللي عطف عليه وعطاه “والماس” رأسمال بنصالح كيتحسب بمئات الملايير.

الباطرونة رئيسة اتحاد مقاولات المغرب، يعني هي رئيسة موالين الشكارة فالمغرب كامل، المرأة القوية مولات المواجهات الشهيرة مع بنكيران من نهار استدعى شي رجال أعمال أتراك ومبغاتش تحضر هي وباقي الباطرونة، ومن بعد هادشي رفضت بن صالح قرار الحكومة الزيادة فالحد الأدنى للأجور “السميك”، وقالت عليه باللي أنه عندو اثار سلبية على اقتصاد المملكة، أخر حاجة كتدل على أن بنصالح كتحكم هي شي خبيرات خرجو كيقولو بلي بنصالح ممكن تولي مستشارة ديال الملك.

إلياس العماري فكاك الوحايل

الأمين العام لحزب الأصالة والمعاصرة ورئيس جهة طنجة تطوان الحسيمة، فاش كان السابق الانتخابي على رئاسة جهة طنجة العالية والغالية، شي صحافي سول إلياس العماري واش غادي ينجح فرئاسة الجهة إلياس بكل ثقة جاوب وقال “سولو هداك اللي كيتنافس معايا واش ممكن يكون رئيس الجهة”

قصة إلياس العماري كتب عليها الجميع، ولكن قليل اللي كيطرح السؤال منين كتجي السلطة والقوة لإلياس.. الجواب بسيط من شبكة العلاقات الداخلية الخارجية ديالو، ولكن بشكل كبير بالوساطات اللي دار إلياس العماري من وفاة الحسن الثاني إلى اليوم بين المعارضين وبعض المناضلين والقصر.

العماري موجود بقوة فأمريكا اللاتينية وعدد ديال رؤساء الدول تما كيستقبلوه، وعندو نفوذ حتى فإفريقيا، مصادر بابوبي قالت لينا إنه حسب دوائر مقربة من القرار إلياس هو الوحيد اللي ممكن يزعزع الموقف ديال جنوب إفريقيا من مغربية الصحراء. هو الرجل القوي فالديبلوماسية الموازية، ولكن الضربة الكبيرة ديالو كانت هي استقطاب دولة الصين وفتح المجالات السياسية والاقتصادية معاها، وهادشي الملك راه ذكرو فالخطاب الأخير لأنه اعتبر أن هاد الخدمة الديبلوماسية مع الصين ممكن تعوض محور الغرب فقضية الصحراء. بزاف ديال السياسيين ورجال الأعمال كيدقو الباب ديال العماري فاش كتصعب عليهم شي حاجة، وكلهم عارفين أن إلياس العماري ممكن يقضي ليهم الغرض.

المنصوري جريو علينا كاملين

فاش خرجت حركة 20 فبراير للشارع، عيط القصر على ياسين المنصوري يتشاور معاه فالأحوال السياسية وكان المنصوري هو الرجل الوحيد اللي كانت عندو الشجاعة يقول إذا بغيتو المغرب يتقاد خاصكم تطردونا كاملين..

محمد ياسين المنصوري أول مدني كيشد التسيير ديال الاستخبارات الخارجية المغربية، فاش تعين محمد ياسين المنصوري مدير “لادجيد” كانت غريبة شوية حيت هداك منصب كان مخصص للعسكر بحال أحمد الدليمي، عبد الحق القادري ثم أحمد الحرشي، وربما على هادشي “لادجيد” معاه ولات حاجة أخرى. المنصوري خدم فالإدارة الترابية “لاديستي”، والإعلام والهجرة السرية والتهريب.

درباتو FBI وخدم مع البصري وشاف كيفاش كانت كتصاوب الانتخابات فالمغرب، وخدم كذلك مدير ديال لاماب وتعرف على الإعلام مزيان، وأهم إنجازاتو هو أنه قدر يصالح المغرب مع إسبانيا بعد أزمة جزيرة ليلى لأنه قدم ليهم برنامج متكامل على التهريب والهجرة، الغريب فالمنصوري أنه رجل مستقيم معندوش مع القصاير أو السهر أو شي حاجة أخرى، وعمرو ما كان كيبغي الظهور مرة وحدة تكلم مع جريدة الواشنطن بوست وقاليهم “خاصكم تعرفو أنه مغرب جديد كيتشكل…”

أحيزون مول التيليفون، كيشد أكثر من الملك

فاش كان أحيزون موظف كبير فوزارة البريد، وفعام 1983 كان هو الشخص الوحيد اللي طلب أنه ينزل فسلم الترقي الوظيفي وطلب غير مديرية صغيرة اسمها مديرية الهاتف، هاد المديرية هي اللي غادي تولي أكبر شركة فالمغرب تحت اسم اتصالات المغرب، الرجل معروف بالذكاء ديالو، ولكن العاملين معاه كيعرفو أن وراء ابتسامة ابن تيفلت العريضة هناك دكتاتور حقيقي. هو اليوم مدير مهرجان موازين وهادشي بسبب الانتقادات الكبيرة اللي توجهت للماجيدي فاش كان مدير المهرجان، الدوائر العليا كتعرف مزيان باللي احيزون هو الوحيد اللي يقدر ينقص من السخط الكبير على موازين لأنه كيتحكم فالإشهار وبالتالي غادي يقدر يسكت الصحافة، أحيزون اللي يعتبر الصالير ديالو أكبر صالير فالمغرب حيت كيشد 55 مليون سنتيم أكثر حتى من الملك.

المهندس اللي قرا فالمدرسة العليا للاتصالات بباريس، بعد هاد النجاح كامل ربما كيتوجد لمهمة أخرى لجوج ديال الأسباب، أولا الغضب ديال زبناء اتصالات المغرب خصوصا فاش منع المكالمات المجانية والتراسل بالفيديو اللي كانو فالواتساب والفايبر والسكايب، ولكن مصدر بابوبي قال بلي احيزون غادي يكون في مهمة أكبر. إيوا زيد حكم أسي احيزون… أخيرا اللي مكيعرفوش الناس أن أحيزون ورغم القوة ديالو مكيزيدش الهدرة مع المغنية الشعبية نجاة اعتابو لأنها بنت بلادو وعارفة أش كاين.

سميرة سيطايل دوزيم الحديدية

واحد المرة بنكيران قال لشي أطر ديال البيجيدي “هاديك مديرة الأخبار فالقناة الثانية “عيطات علي ف2011 وكانت كتبكي وكتطلب وترغب”. جات سميرة مدوزاتاش ليه حيت بيناتهم الحرب بادية من شحال هادي، وصرحت للصحافة أن بنكيران كيضغط عليها  و”كيتحرش بها” وأنها صحفية كتخدم ومخايفاش منو.

هادشي هو الظاهر، ولكن اللي بين بوضوح أن المرآة الحديدية قوية و”كتحكم” حتى هي فمعركة دفاتر التحملات، اللي بغات حكومة بنكيران تفرضها، وكان الخلفي غيكون هو أول الضحايا، سميرة رفضت بإصرار ومقدر عليها حتى شي واحد واخا جابو نبيل بنعبد الله يحل المشكلة، ماقدرش يقنع سميرة بشي حل وسط وانتصرت المرأة الحديدية، اللي خرجت فحوار مع جريدة الأحداث المغربية وقالت، هاد دفاتر التحملات قتل مبرمج لدوزيم وهي ماغتسمحش بهادشي وأن الأسباب ديالها مهنية، وبنكيران باغي يضرب مبدأ استقلالية وسائل الإعلام على السلطة التنفيذية وعلى السياسة”.

راجل سميرة السفير فبلجيكا عندو علاقة طيبة مع ملك بلجيكا، وسميرة مراتو عندها علاقة جيدة جدا مع الملك، وكتعتبر صديقة ديال الأسرة الملكية وعندها الكارط بلونش والثقة الملكية الكاملة.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *