منيب: بأصوات الفايسبوك، غادي نكون رئيسة الحكومة

منيب: بأصوات الفايسبوك، غادي نكون رئيسة الحكومة

بابوبي: الدكتورة ما بقيتيش مقاطعة الانتخابات فظل الدستور الممنوح ؟

نبيلة منيب: بابوبي هاديك لهضرة ديال عشرين فبراير ما بقيتش باغية نسمعها، هاديك لوقيتة اللي كنا كنقولو فيها هاد لكلام كانت نايضة ربيع عربي وثقنا أن الشارع غادي يقربلها وغادي نطلعو للحكم، ولكن من بعد عرفنا أنه ما كاين والو. دابا درنا عقلنا ورجعنا للسطر بحالنا بحال لخوت.

بابوبي : نبيلة نتي أمينة عامة ديال حزب ومرشحة فاللائحة الوطنية..مشي حشومة زعما؟

نبيلة منيب: ف2015 ترشحت فالانتخابات الجماعية فاللوائح المحلية وما قدرتش نجيب مقعد جماعي ب1300 صوت. واش بغيتيني دابا نترشح فاللائحة المحلية عاوتاني و نسقط مرة أخرى، ترشحت فاللائحة الوطنية باش نجمع الأصوات ديال الرفاق فالمغرب كولو ونطلع للبرلمان حتا أنا جات نوبتي باش نكون فالقبة.

بابوبي: ولكن المشكلة هي إيلا ما جمعتوش الأصوات اللي غاديين ينجحوك؟

نبيلة منيب: بابوبي بنتي ليا نتا ما عايش معانا فهاد العالم، حل الفايسبوك غادي تلقى كلشي خاشي وجهو فالرمز ديالنا الرسالة، المثقفين والفنانة واخا ما مقيدينش وما كيصوتوش كلهم تيدعيو الجمهور باش يصوتو عليا.

بابوبي: لنفرض نجحت خاصك تلبسي الجلابة لبيضا وتجي لحفل الولاء وتنساي هاديك لهضرة ديال الملكية البرلمانية؟

نبيلة منيب: حنا حزب يساري تنديرو التحليل الملموس للواقع الملموس، ملي غادي نلمس المقعد ديالي فالبرلمان والتعويضات والسفريات والتقاعد غادي يتبدل التحليل ديالي لهاد الواقع اللي غادي يولي يجيني فيه عادي هادشي ديال الملكية التنفيدية والطقوس ديالها.

بابوبي: قلتي أنك ما غاديش تحالفي مع لخوانجية والأحزاب الإدارية و معامن غادي تحالفي بالسلامة والعافية؟

نبيلة منيب: على حساب الأصوات اللي جمعت فالفايسبوك وتويتر غادي نكون رئيسة الحكومة بالأغلبية، وفحالة ما كانتش عندي الأغلبية غادي نشوف شي حزب كي ما كان نكمل به، هادي غير هضرة ديال الحملة كلشي كيقولوها وملي كيربحو كيقولو هضرة أخرى..لمغاربة دغيا كينساو.

مقالات ذات صله