واش بدات الحملة؟

واش بدات الحملة؟

زهور باقي

تصريحات واتهامات نارية بين «القامات» السياسية. حزب الاستقلال واتهاماتو الخطيرة للمجلس الدستوري ولوزارة الداخلية، والاتهامات المتبادلة بين أحزاب «البام» و»البيجيدي»، وبين «الاستقلال» و»البام»، وبين «البيجيدي» والاتحاد الاشتراكي، وبين الاتحاد الاشتراكي والتقدم والاشتراكية، وبين «البيجيدي» والتجمع الوطني للأحرار، وبين وزارة الداخلية والاستقلال. واش بدات الحملة الانتخابية  قبل الوقت؟

نتا معانا ولا مع لوخرين؟

تقدر تلقى مثلا متعاون فالحملة الانتخابية لابس قميص فيه شعار «الكتاب» وفنفس الوقت كيوزع مناشير  «التراكتور» وتقدر تلقى واحد راكب فوق التراكتور وهاز «اللامبا»، يقدر مول «اللامبا» يحرق بيها  «الميزان»، ويقدر «الميزان» يبانليك هاز «الكتاب»…كولشي «هازو» لكولشي… وشي «عاطيه» لشي…الحياة السياسية المغربية مافيهاش منطق وهاد اللامنطق كيزيد يترون فاش كتقرب الحملة الانتخابية اللي كتفصلنا عليها 3 أشهر. كولشي مضبر على راسو والانتخابات جاية والدنيا هانية والسما صافية. هاد شي كايبين على أنه الفقيه اللي كنتسناو براكتو داخل للجامع ببلغتو، والمتعاونيين مع اللأحزاب ماهوما إلا انعكاس لواقع الحياة السياسية اللي ماشي البرامج الانتخابية اللي كتحكمو والتحالفات مكاتبناش على قرب إيديلوجي أو سياسي وإنما تحالفات من أجل المصلحة ماشي «المصلحة العليا « للبلد لا، وإنما المصلحة العليا ديال كل حزب باغي حقيبة وزارية بأي ثمن. واش بدات الحملة الانتخابية؟ «عمر الشرقاوي المحلل السياسي صرح لبابوبي وكيقول:   «الحملة لم تنته لتبدأ، منذ 2011 ونحن في حملة. مارس بنكيران الحملة وهو يحضر الجلسات الشهرية المنقولة مباشرة على التلفزة والإذاعة استمرت الحملات بمناسبة كل قانون يحمل رهانات اجتماعية بحال التقاعد، مارس الحملة خلال إصلاح صندوق المقاصة والمقاصة، استمرت الحملة وسط الولاية خلال الانتخابات الجماعية ولا زالت الحملة مستمرة خلال نهاية الولاية رغم أن القانون يحدد الحملة في 15 يوما» الحملة الانتخابية اللي حددها مرسوم وزارة الداخلية من 24 شتنبر ل 6 أكتوبر. ويضيف عمر «هاد المرحلة عرفت أكثر أنواع الانتخابات. الانتخابات الجماعية، العمالات والأقاليم، الجهات، الغرف، النقابات، رجال الأعمال، اللجان الإدارية للوظيفة العمومية والقطاع الخاص، مجلس المستشارين، المحكمة الدستورية، كل هذه اللحظات كانت تبقي منطق الحملة حاضرا لكن الصراع بين البيجيدي والبام هو من جعل الحملة لا تنتهي لأن كلا الطرفين لا يراهنان على الوقت لإنهاء المعركة مع ما يتطلب ذلك من تبادل الاتهامات والحرص على إبقاء المواجهة مفتوحة. القادة السياسيين يدركون أن خطاباته لا تستتبعها أي ترتيبات سياسية فهو يقول ما يشاء اليوم، ويفعل ما يشاء غذا وهذا بطبيعة الحال له تأثير على ثقة المواطن فالسياسة» هادشي ديال التحالفات الحزبية كيفكرنا بنكتة «واش نتا معانا ولا مع لوخرين»، لا أنا مع لوخرين، وحنا هوما لوخرين».

حلال معانا وحرام معانا تاهو

الصلاة وهادشي ديال الدين والأرنبات وداكشي توظفت وخرجات صورة لإلياس العماري وهو خارج من صلاة التراويح وجاوب وقال بأنه ماشي هو اللي خرجها وكيحارب الدين بالسياسة وإنما خرجوها الكتائب الإلكترونية «للعدو»، «العدو» دار هجمة مضادة وخرج من جيهتو لائحة الناجحين فالأمانة العامة للحكومة واللي فيها اسم سمية بنكيران بنت رئيس الحكومة واللي نوضات بلبلة فالفاسبوك واعتبروها المتتبعين تناقض بين رئيس حكومة ولايتو كلها وهو معلن الحرب على الوظيفة العمومية وبين رئيس الحكومة اللي بنتو خدمات فوظيفة عمومية. والمغاربة اللي ناقصهم عقل ومتبعين شوية هاد الشأن السياسي واقفين بحال متفرجين فماتش ديال التينيس.. شي كيسماتشي لشي وشي كيرد على شي …والنتيجة بيد الله ماشي بيد الله ديال « البام» .. لا «بيد الله» لاخور ديال البيجيدي.

قضية الصحراء تا هي ماخطاوهاش وهنا بدع شباط فتصريح ضد العماري وقال «أن موقفو من الصحراء أخطر من تصريحات بانكيمون». ها اللي كيفرق بطاقات الوطنية والتخوين ها اللي كيفرق صكوك الغفران بين الجنة والنار والحلال والحرام والملائكة والشياطين وهي مهمة بنكيران اللي قال فخرجة إعلامية «اللي بغا الجنة يصوت على البيجيدي» خرج ليها نيشان. داكشي ديال خليفة اللله على الأرض.

اللعب كبير

فإطار هاد الحركية المشتعلة والتصريحات النارية «واللي مابقيناش كنفرقو واش هي داخلة فإطار التدبير اليومي للشأن السياسي ولا حملة انتخابية سابقة لأوانها» كيما كيقول المحلل السياسي محمد العرماني بوخبزة. خرجو مجموعة ديال التصريحات والتقارير عن مؤسسات عمومية نافذة، تنتقد وترصد الوضع السيئ لحالة الاقتصاد والمجتمع، مثل تصريحات والي بنك المغرب، وتقارير مؤسسات عمومية مثل «المجلس الأعلى للحسابات»، و»المجلس الاجتماعي والاقتصادي والبيئي»، و»المندوبية السامية للتخطيط». تقارير معروفة عليها الموضوعية ولكن التوقيت ديالها هو اللي كيطرح تساؤلات. إضافة إلى توقيت خروج رجال الأعمال من خلال منظمتهم «فيدرالية رجال الأعمال المغاربة»، للهجوم على الحكومة وانتقاد أدائها الاقتصادي. .اييه وخمس سنين هادي فين كنتو؟ وعاد النقابات علات من سقف المطالب الاجتماعية وشعلاتها… حملة هادي ولا مش حملة يا متعلمين يا بتوع المدارس؟

محمد العوماني بوخبزة كيعتبر أن «الانتخابات البرلمانية ديال 2016 العنصر الجديد فيها واللي تزاد فالقانون التنظيمي هو ضرورة تزكية المرشح داخل الحزب من أجل القضاء على ظاهرة الترحال وتخليق الحياة السياسية. أو أنه يكون مستقل ويجمع أصوات مباشرة من الهيئة الناخبة. وهادشي كيخلي السباق نحو الكرسي كيبان عبر المشاركة في دوريات كرة القدم أو توزيع المحفظات أو تقديم خدمات إنسانية للظهور بمظهر المنقذ. وبالتالي معركة المرشحين داخل الأحزاب، معركة المنتخبين في تلميع صورهم أمام الرأي العام، زد على ذلك أن الفائزين في مقاعد بالانتخابات الجماعية لهم نقاط إضافية مسجلة مع المواطن في علاقته به كمنتخب جماعي، فهي مدخل للانتخابات البرلمانية». الأحزاب تتشابه في كل شيء حتى في مطالبتهم بضرورة الزيادة في المستوى التعليمي، ومحاربة الفساد والمطالبة بشروط مهينة ولكن شكون اللي كيتهجى في البرلمان وشكون اللي كيضيع المال العام وشكون اللي كيتضبطو عليه حالات الفساد من غيرهم هوما نيت اللي كيطالبو بالأخلاق والتخليق. أما سامي المودني صحفي فكيعتبر «هذه اللعبة، أي لعبة تبخيس الفعل السياسي الغرض منها أساسا الدفع نحو سطوة التكنوقراط على المشهد السياسي، أعتقد أن كل ما نعيشه اليوم من تدني للخطاب السياسي وتناقض في المواقف يرجع إلى غياب استقلالية الفعل السياسي. وهو الأمر الذي لا نركز عليه مع الأسف».

فهم…تسطا!

اتهامات بالجملة بين الأمناء العامين للأحزاب ومكاين تا شي تدخل قضائي أو دعوة للرد على هاد الاتهامات اللي كتقيس المواطن. السياسيين كيتهمو بعضياتهم بشكل عادي وكأنها جزء من اللعبة الانتخابية. ها العماري يعتبر أن الحكومة الحالية ضيعت فلوس هاد الولاية اللي خداتها من الدول الصديقة واللي قدرها ب5 ملايير دولار فإشارة لدول الخليج. بنكيران من جهتو مامقصرش وفأي مناسبة كيخرج بتصريح بأن البام «حزب قريب من القصر وكيمثل التحكم والتسلط». إدريس لشكر، الكاتب الأول لحزب «الاتحاد الاشتراكي»قال أن البيجيدي تاهو ابن المخزن…ودابا كيفاش حزب اشتراكي المرجعية وحزب «المهدي بنبركة» كيدافع على «البام» اللي هو حزب أسسو فؤاد عالي الهمة صديق الملك وكبر بسرعة صاروخية وولى كيتقاسم الأصوات مع البيجيدي.  عندما تدافع الاشتراكية عن القصر وعندما يضيء المصباح طريق الحمامة وعندما يصبح الميزان حليفا للامبا. لا رمز ولا يمكن الاعتماد عليه ففهم الحياة السياسة.  أما شباط فخارج ليها نيشان فبلاغ رسمي  وكيتهم وزارة الداخلية بالتحكم في نتائج الانتخابات وفحكم المجلس الدستوري في المغرب بإسقاط عضوية 7 من حزب الاستقلال، بتهمة «تقديم رشاوى» للتصويت لصالحهم.

حميد شباط اللي خوا ببنكيران ف2013 وانساحب من الحكومة وتعوض بالتجمع الوطني للأحرار… ايييه الأحرار اللي كان منوضها مع البيجيدي قبل هادشي كامل تا لقيناهوم فالحكومة وكأن شيئا لم يكن ولم يقل.. ودابا حزب الاستقلال اللي كان كيتهم بنكيران بالتدعشش، هاهو دابا بعد مرور ثلاث سنوات كيدافع على بنكيران وكيقوليك نحن نتحالف مع البيجيدي  لأن البام لوث الحياة السياسية ومشا أكثر من ذلك وهضر على تلقيه تهديدات من قيادات فحزب «البام» من أجل مساندة مرشحين بعينهم، دون أن يكشف عن أسماء هؤلاء القياديين في «الجرار»، الذين قاموا بتهديده. وفهم تسطا.. الاتهامات بالجملة ومكاين تا دعوة قضائية أو رد من وزارة الداخلية.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *