راديو ميدي1 يوضح… ماشي شي توضيح !!!

راديو ميدي1 يوضح… ماشي شي توضيح !!!
  • بابوبي/طنجة

من بعد الزبلة ديال برنامج “أفريك أنفست” اللي داز نهار السبت فراديو ميدي1 والضجة اللي جات على خلفية ماورد فيه من إساءة للعلاقات المغربية النيجيرية بعد وصف النظام النيجيري بـ”الفاسد” وبأنه على حافة الانهيار. خرجات إدارة ميدي1 بواحد التوضيح تنفي فيه ما تداول.

البلاغ التوضيحي لميدي1 راديو فيه التوقيع ديال زوج د المسؤولين من مديرية الأخبار، ابراهيم الغربي وكريستوفر كودينو، وتايقول أن داكشي اللي تقال أو تنشر “غير دقيق” وأن الراديو يرفض أي “صيغة سياسية” لمضمون التصريحات الواردة فالبرنامج.

من غير هادشي معظم فقرات البلاغ تاتعوم فالعمومية وفلغة الخشب من قبيل “استعراض رهانات الزيارة الملكية إلى هذا البلد الإفريقي” و”المشاريع المهمة التي يباشرها فخامة رئيس نيجيريا” التي تطرق إليها البرنامج.. وزيد.. وزيد.

ولكن اللي تايأكد أكثر أن توضيح ميدي 1 ماشي شي توضيح نيت، هو أن الحلقة المعلومة ديال نهار السبت لم يتم تنزيلها في الموقع الإلكتروني للراديو، حيث آخر حلقة للبرنامج تاترجع لـ 26 فشهر نونبر.

وهادشي كامل تايفضح أن المغاربة فهاد الراديو هما اللي محكورين، حيت الإدارة فأكثر من حالة تقف عاجزة عن معاقبة الفرنسيين “مهما عظمت أخطاءهم”..

الله إعطينا زهر الفرنسيس وصافي.

مقالات ذات صله