حوار إفتراضي // محمد الوفا يعلّق على الأزمة الشباطية بالهندية : سَابوعي داشاراف، شيطاحا فوكا ظاهيرو كورودا

حوار إفتراضي // محمد الوفا يعلّق على الأزمة الشباطية بالهندية : سَابوعي داشاراف، شيطاحا فوكا ظاهيرو كورودا

السي الوفا، ما رأيك في ما يجري؟

ـ (يفكر قليلا) آش بيتيني نقول؟ ومنين بيتيني نبدا؟ واش ندّاكرو على البلوكاج الحكومي اللي لاحنا  كاملين في الركنة شادين حق الله نتسناو الفرج؟ ولا ندّاكرو على الناس اللي محاصرة في الثلج وحنا كجهاز وصي صم بكم عمي لا يعقلون؟ ولا ندّاكرو على الكارثة ديال الكوووكب اللي من نهار بديت نتفرّج فيها ما عمرني شفت هاد اللي تنشوف دابا؟ (يبدأ بالبكاء) فاش بيتي نقول ليك رأيي؟ فاش؟

ما رأيك في الأزمة التي خلقتها تصريحات شباط؟

(يتوقف عن البكاء. يرفع يده كمن يوقف الحديث. يخسّر وجهه كمن شمّ رائحة كريهة) الله يرضي عليك ما تبقاش تجبد ليا هاد السمية. واش عمرك سمعتيني جبدتو على فمّي من نهار خرجت ف حالي من الحزب وخليت ليه الديب وقلالشو؟

هل تستحق تصريحاته كل هذه الضجة؟
(ينظر إلي جيدا) أنا غنقول ليك واحد الحاجة يمكن ما عمرني قلتها في حياتي. أنا واحد النهار نقول ليك في شهر ثمنية ولا شهر تسعود ديال العام اللي فات شفت واحد الرؤيا في المنام، فيها كَاع هاد الشي اللي طاري دابا.

أشنو شفتي؟

شفت راسي هاز صنارة صغيورة قدّام واحد الضاية صغيرة تنصيّد فيها، ومعايا بنكيران حتى هو هاز صنارة صغيورة. سامرين على الحوت بجوج صنارات قصارات، حيت حنا تنصيدو غير في ضاية ماشي في المحيط الهندي. المهم، واحد الشوية تلفتنا وحنا نلقاو هاداك اللي ما باغيش نقول سميتو واقف تيتكَلْيَطْ في جنابنا، عرفتو غير من الموسطاش، كان هاز صنّارة طويلة وثقيلة عليه. جانا لعجب، وقال ليا بنكيران: مالو على هاد الصنارة الطويلة باغي يصيّد التماسيح؟ وأنا نقول ليه: هاد الصنارة طويلة غيفوت الحدود ديال الضاية، وغيصيّد راسو. وفعلا ها الرؤيا ديالي تحققات هاد الأيام.

هل تستحق تصريحات شباط كل هذه الضجة؟

(باستياء) في الحقيقة، كون تشاور معايا حصاد ومزوار ما نخليهمش يخرجو هاداك البيان كَاع. علاش؟ لأننا غير بينا نفيقو العمى على ضريب الحْجر. فالإخوان في موريتانيا تفرجو في الحلقة ديال السي بنكيران مع هاداك السيد أشنو سميتو، (نسي الاسم) هاداك الصحفي المصري… يا ربي تبّتنا على لعقل.. قول ليا أشنو سميتو؟ (يفكر مرتبكا) راه عندو اللحية وهو اللي كان دار فضيحة نتاع الزواج العرفي…

(مقاطعا) واش بنحمّاد؟

(غاضبا) آش من بنحمّاد؟ تنقول صحفي وأنت تتقول ليا بنحمّاد؟ راه خدام يا هاد الكُعبي في قناة الجزيرة.

أحمد منصور؟

(بارتياح) هاداك. الإخوان الموريتانيين تفرجو في الحلقة وسمعو بنكيران أشنو قال على هاداك اللي ما بيتش نجبد سميتو. قال عليه: “هبيل داوي خاوي، وما كينش شي واحد في المغرب تيدّيها على الهضرة نتاعو، وتيضحكو عليه”.

وبماذا تفسّر قرار بنكيران الذهاب إلى موريتانيا؟

غادي ليهم بالسيدي اللي مسجلة فيه هاد الهضرة. باش يعرفو بلي هاد السيد مرفوع عليه القلم.

ولكنه زعيم لأقدم الأحزاب الوطنية؟

حزب قديم يعني شارف. والله يرحم واحد الشاعر هندي تلاقيت بيه ملي كنت سفير في الهند، وقال ليا واحد البيت شعري غنقولو ليك بالهندية، وما نترجموش ليك. قال ليا: “سَابوعي داشاراف، شيطاحا فوكا ظاهيرو كورودا”.

مقالات ذات صله