حوار إفتراضي // هيرفي رونار بعد الهزيمة عندكم شي حاجة ما مخلية حتى حاجة تصدق

حوار إفتراضي // هيرفي رونار بعد الهزيمة عندكم شي حاجة ما مخلية حتى حاجة تصدق

مسيو رونار آش داك الشي؟

ـ (مخنزرا) آش داك الشي أنت؟ أنا نتسناك تسولني على الماتش، وأنت جاي كتقول آش داك الشي. درْتي ليا بحال  الواليد نهار حصّلني أول مرة شاد بّينة ديال الكَارّو في الجردة. (بانفعال) سوّل في الكرة يلا كنتي كتفهم شي ….. (كلمة فاحشة)

ودابا علاش تتخسّر في الهضرة؟
حيت نتوما الماروك. سركم غتخراج العينين. الواحد معاكم كوول، تتبغيو تاكلوه. وسوّل يلا بغيتي تسول، راني كاعي مزيان وباغي نمشي نضرب الطاسة حتى يبان ليا داك منديل هو مارسيللو.

طيب، هل توقعت الخسارة أمام الكونغو الديموقراطية؟

نكدب عليك؟ لا. ما توقعتهاش. أنا قوتي اللي خلاتني فايت المغرب كلو في الفوز بكأس إفريقيا، حيت أنا عندي جوج وهو باقي عندو واحد من أيامات بابا… ما علينا، سر القوة ديالي هو في عنصر المفاجأة، كنفاجأ الجمهور واللعابة ديالنا قبل ما نفاجأ الخصم. الساعة… معاكم ما صدقاتش.

وفين استخدمت عنصر المفاجأة؟

علاه ما شفتيش شي لعابة ما عمرك سمعتي بيهم حتى شفتيهم لاعبين مع المنتخب؟ وماكانوش حتى في اللائحة الأولية ديال الكان. (بفخر) هادي هي الوعورية ديالي. أي مدرب أو محلل فاشل غادي يقول ليك ما يمكنش شي لاعب تجيبو أول مرة تلوحو في منافسة بهاد الحجم ويدير شي حاجة. ولكن، أنا درتها ودّيت بيه جوج كؤوس إفريقية. ولكن معاكم ما صدقاتش. (يتساءل) عندكم شي حاجة في هاد المغرب ما مخلية حتى حاجة تصدق؟

آش باغي تقول؟

آآآوْ، واش كَاع زعما هاد المدربين اللي دربو المغرب فاشلين؟ واش كَاع هاد اللعابة اللي دازو عيانين. (باندهاش) لا تعليم لا صحة لا نقل لا حكومة لا برلمان لا منتخب وطني… (بيقين) ما تقولش ليا، نتوما يا المغرب دايْرين ليكم الدْيار.

أشنو زعما، تكون دافناه لينا الجزائر في العتبة؟

ما نظنش، اللي دايرينو ليكم كاينين معاكم للداخل.

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *